Կրայովայում տեղի ունեցավ Սուրճի փառատոնի առաջին թողարկումը
Կրայովայում պատմական հայկական համայնք մինչև Հայոց ցեղասպանությունը որպես այդպիսին գոյություն չի ունեցել: Ցեղասպանությունից հետո մի քանի տասնյակ հայ ընտանիքներ հաստատվեցին ռումինական այս գեղեցիկ քաղաքում և ձևավորեցին թեև փոքր, բայց բավականին ակտիվ համայնք։ Կոմունիստական ռեժիմի ընթացքում և հատկապես դրանից հետո քաղաքում հայերի թիվը զգալիորեն նվազեց, և ընդամենը 4 տարի առաջ (2020 թվականին) Կրայովայի մի քանի հայեր հիմնեցին Ռումինիայի հայոց միության Կրայովայի մասնաճյուղը։
Ուրախ ենք արձանագրելու հայ ոգու վերադարձը Կրայովա, որի սրտում՝ «Մարին Սորեսկուի» անվան ազգային թատրոնի բակում, անցկացվեց Սուրճի փառատոնի առաջին թողարկումը:
Կրայովայում սուրճի վերաբերյալ ամենագունեղ հիշողությունը Մելիքյանների ընտանիքն է իրենց սրճարանով, որը գործում էր նույնիսկ կոմունիստական ժամանակաշրջանում: Տեղացիները և ոչ միայն նրանք մինչ այժմ հիշում են «Հակոբի մոտ» (La Agop) վայելած սուրճի անկրկնելի բույրը:
Միջոցառումն անցկացվեց 2024 թվականի հունիսի 14-16-ը, որը կազմակերպել էր Ռումինիայի հայոց միության Կրայովայի մասնաճյուղը (նախագահ՝ Սաթենիկ Նեաքշու-Մելիքյան): Փառատոնը մեկնարկեց բացօթյա տոնավաճառով, որտեղ այցելուները հնարավորություն ունեցան ուսումնասիրել և ձեռք բերել հայկական տարատեսակ ապրանքներ ու ձեռագործ աշխատանքներ, ինչպես նաև սուրճ համտեսել:
Փառատոնի առաջին օրը ցուցադրվեց «Երբ մահն ուշանում է հայտնվել» ֆիլմը (ռեժիսոր՝ Արմինե Ոսկանյան), իսկ հաջորդ օրը Բուխարեստի հայկական ավանդական պարերի «Վարդավառ» անսամբլը հրաշալի ելույթով ներկաներին ուրախացրեց պարային յուրահատուկ ռիթմերով։
«Մարին Սորեսկու» ազգային թատրոնի ճեմասրահում Արշալույս Սարգսյան Գուրըուն մտերմիկ և ընկերական միջավայրում ներկայացրեց «Հիշողություններ ոսկե դարաշրջանից» գիրքը՝ գրավելով ներկաների ուշադրությունը արժեքավոր պատմություններով ու հիշողություններով։ Փառատոնի ողջ ընթացքում ներկա էր Ռումինիայի հայոց թեմի առաջնորդ Գերաշնորհ Տաթև եպիսկոպոս Հակոբյանը, որը նույնպես ելույթ ունեցավ Ա․ Գուրըուի գրքի շնորհանդեսին:
Արմինե Ոսկանյանը ներկաների համար ընթերցեց բանաստեղծությունների շարք՝ միջոցառմանը հաղորդելով զգացմունքայնություն։ Փառատոնն ավարտվեց Կոսմին Բըլեան Բենդի համերգով, որի անդամները դուդուկի և ջութակի ելևէջների միջոցով անմոռանալի երաժշտական պահեր պարգևեցին ներկաներին։
Միջոցառումը լուսաբանվեց տեղական ԶԼՄ-ներում:
