Կյանքից հեռացավ մեր գործընկեր Էդուարդ Անտոնյանը
Ռումինիայի Հայոց Միությունը և «Արարատի» խմբագրակազմը ցավով հայտնում են մեր գործընկերոջ և ընկերոջ Էդուարդ Անտոնյանի մահվան մասին:
1997թ․ Բուխարեստի համալսարանի պատմության ֆակուլտետի շրջանավարտ Էդուարդ Անտոնյանը միացավ «Արարատի» խմբագրակազմին և միևնույն ժամանակ, որպես երիտասարդական կազմակերպության ներկայացուցիչ, նպաստեց Ռումինիայի Հայոց Միության գործունեությանը: Նա շարունակաբար մասնակցում էր Ռումինիայում անցկացվող սեմինարներին և սիմպոզիումներին, որոնք տեղի էին ունենում ազգային փոքրամասնությունների ներկայացուցիչների հետ, որտեղ խոսում էր Ռումինիայի հայ համայնքի պատմության մասին: Նա պաշտպանեց իր դիպլոմային աշխատանքը Հայոց ցեղասպանության վերաբերյալ, այնուհետև հրապարակեց մի շարք հոդվածներ այս թեմայով: Միհայ Ստեփան Կազազյանի և Ռումինական հեռուստատեսության թիմի հետ համագործակցությամբ պատրաստեց «Էմանուել՝ երազանքը միայն երազանք» վավերագրական ֆիլմը Մանուկ բեյի կյանքի մասին, իսկ վերջին տարիներին համագործակցում էր «Այլ փոքրամասնությունների» խմբագրության հետ` հայ համայնքի վերաբերյալ հարցազրույցներ և ռեպորտաժներ պատրաստելով։ Նա մասնակցեց Երևանում անցկացվող միջազգային սիմպոզիումին, որը նվիրված էր Մանուկ բեյ Միրզայանին, այնուհետև ուղևորվեց դեպի Արցախ, որտեղ ռեպորտաժ պատրաստեց տեղի հայերի մասին: «Արարատ» ամսագրում լույս տեսած հոդվածները բազմազան էին. հայազգի հայտնի մարդկանց հետ հարցազրույցներից մինչև հայ համայնքի պատմության վերաբերյալ հոդվածներ, իսկ վերջին տարիներին նա մի մշտական սյունակ ուներ՝ «Անցյալի Արարատը» խորագրով, որում նա ներկայացնում էր քաղվածքներ համայնքային կյանքի կարևոր պահերի վերաբերյալ հոդվածներից, որոնք տպագրվել էին «Արարատ» ամսագրում միջպատերազմյա շրջանում: Նա ընդունվել էր Կլուժի Բաբեշ-Բոյայի համալսարանի պատմության ֆակուլտետի դոկտորատ… որը, ցավոք, չհասցրեց ավարտել:
Նա սիրում էր Հայաստանը, Գեռլայի հայերին, նրա լավագույն ընկերը հանգուցյալ Միրչա Տիվադարն էր, սիրում էր լսել «Iron Maiden» խմբի կատարումները։ Մնացածն արդեն պատմություն է․․․
Աստված հոգին լուսավորի։
